Europa no #EspazoLuzes

Na tarde de onte, o Auditorio Pazo do Mar, de Vigo, acollía un acto ao que tiven a sorte de asistir. Baixo o título "Que Europa? Conversas no Mar de Vigo" a revista Luzes abría un foro de debate e intercambio de ideas co nome de EspazoLuzes que xa puxera a andar no pasado mes de marzo e que chegaba nesta ocasión á cidade olívica. Os directores da publicación, Xosé Manuel Pereiro e Manuel Rivas foron os encargados de presentar e de guiar umha conversa cos/coas candidatas/os galegas/os dos principais partidos políticos que concorren ás eleccións europeas do vindeiro 25 de maio.

Participaron no mesmo José Blanco (PSOE), Paulo Carlos López (CxG), Francisco Millán Mon (PP), Ana Miranda (BNG) e Lidia Senra (AGE). Todas/os gozaron do mesmo tempo para respostar a distintas cuestións que lles axudaron a bosquexar o que representa para eles a UE e o que debera representar para a cidadanía europea.

O acto puido seguirse ao vivo através de streaming e aínda poden verse os distintos momentos nesta ligazón

Entre muitos tópicos, lugares comúns e discursos manidos, houbo momentos nos que as/os candidatas/os deixaron ver algo distinto do que habitualmente amosan, ademáis de participar abertamente nun turno de perguntas do público asistente in situ e através das redes sociais. Mesmo houbo lugar para un grupo de persoas que reivindicaban maior atención ás doenzas crónicas, que xa agardaban ás/aos convidadas/os na entrada do recinto.

Houbo varios discursos que me provocaron umha certa ansia por intervir, que foi minguando na medida que pasaban os minutos. No turno de perguntas tampouco me atrevín a realizar ningumha das que me vinheran á cachola ao longo do acto. Así pois, a necesidade fisiolóxica de botar fóra todo aquilo que anda dando voltas polo maxín, aconséllame soltar neste espazo aquel par de cuestións que quería perguntarlle... non sei ben a que candidata/o.

1. Por primeira vez, o parlamento escolle presidente, o que nos sitúa diante dumhas eleccións -se cabe- máis "decisivas". Aínda así, as/os cidadás/áns seguimos sen manexar datos fiables que nos axuden a decidir por que partido ou coalición apostar. Jean-Claude Juncker (Partido Popular Europeo), Martin Schulz (Partido Socialista Europeo), Guy Verhofstadt (Alianza dos Liberais e Demócratas por Europa), Ska Keller (Partido Verde Europeo) ou Alexis Tsipras (Partido da Esquerda Europea), van ser votados para a presidencia por deputados que nos seus respectivos Estados defenden políticas totalmente diferentes, cuando non contrarias. Cicais faltan clivaxes a nível continental que nos axuden a localizar os espectros de voto. Os clásicos federalismo-centralismo, laicismo-relixión, privado-público... son aquí totalmente vapuleados pola opción "desta ou daquela beira da raia", o que causa umha certa confusión, ademáis de estupor e desencanto entre o eleitorado. Xunto á desmobilización por parte dos principais partidos nesta ocasión, cicais sexa esta umha das razóns da baixa participación nos comicios europeos. Neste senso, que lexitimidade política tería un presidente elixido por menos do 50% do eleitorado?

2. Nun mundo global non é certo que tendan a desaparecer as fronteiras. Desde Breton-Woods as fronteiras acrecentáronse en número e en forza para protexer os intereses (duns máis ca dos outros) nacionais. O progreso non consiste en crear macroestados, con Administracións alonxadas dos problemas da cidadanía. Porén, ao formar parte de proxectos como a UE, si é precisa umha cesión de soberanía, iso si, sen perder a identidade nin a capacidade de decisión. Non hai máis ca mirar para Franza, Alemanha ou Italia e ver como eles non perden o control público da banca ou do sector enerxético. Iso é exclusivo dos Estados que anteponhen outros intereses aos dos seus cidadáns. Neste senso, apostarían pola recuperación do control público do sector enerxético e dun Banco nacional? que medidas tomarían ao respeito?

Polo demáis, agradecer novamente á revista Luzes a creación deste espazo de diálogo, que semella non sabemos crear desde as Administracións nin desde os medios que pagamos entre todas/os.