Isoutro día preguntáronlle á minha filla que quería ser de
maior. Ela, cautelosa, gardou silencio como non entendendo o sentido da
cuestión que lle formulaban por vez primeira. Decorridos uns segundos,
espetounos en voz baixa e coa seguridade dumha persoa libre de aparencias e
convencións sociais: cantante.
Esta pregunta inocente, que nos ensinaron a facerlle aos
nosos filllos [e nas últimas xeracións, tamén ás nosas fillas], revela varias
cousas. Por umha parte, efectivamente, fomenta a descoberta do mundo, da
contorna, das ocupacións ou dos xeitos de ser ou vivir. Por outra –máis gris-
cicais sexa o primeiro paso para decatarnos/ensinarnos que os seres humáns non
somos máis ca ferramentas de traballo. Ferramentas de traballo produtoras de
cualquer cousa susceptíbel de ser vendida, aínda que despois non tenha maior
utilidade nin aporte absolutamente nada ás nosas vidas máis aló do circo creado
para manter a orde mundial.
Non están de moda os valores. Non está de moda o pensamento,
o conhecemento nin as emocións. Se umha nena ou un neno tiver a ocorrencia de
dicir que de maior quer ser umha boa persoa, ou máis agarimosa, ou umha
pensadora ou mesmo umha inventora; adicariamoslle un sorriso condescendente
antes de explicarlle con tenrura -para que aprendera a súa tarefa neste mundo-
que iso está moi ben pero o que vai ter que decidir é o que quer ser “de
verdade”. Porque o “de verdade” é o que entra no sistema produtivo da
multi-ferramenta que pasou a ser a humanidade. Mentres, a creatividade, o
pensamento e os sentimentos (ou sexa, a vida mesma) conforman simples
pasatempos aos que adicar o tempo libre se as nosas ocupacións o permiten.
O ser humán xa non é umha persoa. Nalgún momento deixamos de
autodefinirnos como tal para pasar a sermos "recursos humáns”, termo que
repetimos mesmo con fachenda, convencidos de empregar umha terminoloxía
moderna, acorde cos tempos. Velahí que o mundo estea dividido entre recursos
humáns e recursos materiais, sen ter moi claro –cada vez menos- cuais son os
máis importantes. Gostamos de empregar aquel eufemismo neoliberal para
referirnos ás persoas porque non gostamos que nos avinagren o café coa mala
nova dalguén que viviu, riu, amou... e decidiu segar a súa vida por non poder
manter o teito baixo o que vivían os seus fillos.
O xugo co que a nobreza oprimía ao pobo na Idade Media non
era senón o herdeiro doutras formas de escravismo postas en práctica na
antigüidade, e o precursor do capitalismo máis salvaxe dominado polas
oligarquías e a banca na actualidade. Tempos difíciles os que ventan un país no
que –ao igual que na Idade Media ou na Antiga Roma- voltará a haber
traballadores a xornada completa por baixo do limiar da pobreza. Situación moi
cómoda para as tiranías pero pouco produtiva para o desenvolvemento
sociocultural e científico da humanidade.
Faise preciso un proceso catárquico de ecdise, que nos
permita desfacernos do corpiño que nos oprime impedíndonos medrar como
individuos e como comunidade. Igual que os artrópodos fan coa súa muda, debemos
deixar na beira do caminho aquelas personaxes grises e mediocres que non
souberon ou non quixeron governar o territorio que lles encomendamos, que non
conseguiron ilusionar á cidadanía con proxectos de futuro e que non quixeron
nin queren ponher en valor a nosa capacidade para desenvolvernos como persoas.
Ningún comentario:
Publicar un comentario