Cuando me din que son demasiado vello
para facer algumha cousa, procuro facela deseguida
Picasso
De volta a casa, despois de pasar a tarde sen os sorrisos nin as miradas da persoa que me revitaliza día a día, tiven a sensación de que a cidade estaba triste. E deume por pensar a que se podía deber esa percepción. Se era pola comparación coa pequena Lara, que derrama a mancheas vida e enerxía; se pola sangría que a situación socio-económica está provocando no tecido laboral e empresarial; se acaso os mil e un casos de corrupción, que esgotan e desalentan á cidadanía ou se a ausencia dun clube deportivo nas competicións de elite.
Foi ao cruzar o Paseo que reparei nas
ausencias. Cada ano son muitas as persoas do noso contorno que deixan de
partillar con nós as rúas para pasar a formar parte da nosa lembranza. E neste
ano, especialmente, noto a falla de 2 persoas que transmitían enerxía e ilusión
por vivir.
Dumha parte Amando I. Moure, que cada mes das flores -por máis de 60 anos-
confeccionaba o seu Maio sen máis
intención ca de compartilo coa cidadanía ourensá e manter viva a súa festa
máis querida. Afirmaba que a celebración perdera muito por non manter a
festividade no día da Santa Cruz, mais non por iso deixaba de participar nela
coa mesma ilusión e coas mesmas ansias reivindicativas con respecto a esta
data, ao castelo da Peroxa ou a calquera feito que considerara inxusto. Era un
pracer recibir o agasallo das súas coplas que repartía entre os amigos -como el
dicía- que na realidade eramos todos, ou todos lle tiñamos o mesmo afecto.
Case nas mesmas datas deixounos o
sorriso que iluminaba as rúas do centro e da cidade vella. Os ollos abertos e
vivos, por baixo daquel cabelo branco, curto e sempre ben coidado, acompañaban o
movemento vital da sempre elegante Elvira
Cuevillas. A curiosidade e o atrevemento que nunca lle faltaron, facían da
Elvira unha das persoas máis queridas e admiradas na vella Auria.
De existir un equilibrio natural, imaxino
que destas perdas debemos aprender que tivemos a sorte de partillar
tempo e espazo con esas persoas (e de seguro que con muitas outras), ao
tempo que renovamos os azos de vivir cada día, ponhemos en valor a nosa contorna
-colocando a percepción positiva das cousas por enriba da negativa- e
abrímonos a novos coñecementos e novas sensacións a cada instante. No meu caso
particular, quero ficar na memoria co abrazo do Amando e co ollar vivo e pícaro
da Elvira. Deica sempre, queridos.
Desde aquí quero expresar o meu cariño e recoñecemento ao Sr. Amando, un grande amigo do meu avó Celso que tamén nos deixou recentemente. Posíbelmente hoxe estean a falar das súas cousas onde queira que sexa.
ResponderEliminar